FamilySearch Pahibalo sa Pagkapribado

Ang FamilySearch Internasyonal, usa ka dili pangnegosyo nga korporasyon nga ang ulohang mga opisina niini anaa sa Salt Lake City, U.S.A. (“FamilySearch”), gipahinungod ngadto sa pagsiksik sa family history ug sa genealogy. Kon maghisgot og “kanamo” o “kami” o “among” kami nagpasabot sa FamilySearch. Niini nga Pahibalo, mohatag kami nimo og impormasyon kon unsaon namo sa pagproseso ang imong personal nga mga datos.

Ang paghimo og online nga account sa among website ug mga application (“Website”) o ang pagsumiter sa imong mga datos ngadto sa FamilySearch motugot kanimo nga makaakses sa mga serbisyo ug sa Website nga among gitanyag, lakip na ang paghimo og family tree; pagkonekta sa mga sakop sa pamilya; ug pag-akses ug pagpakigbahin sa mga litrato sa pamilya, digital nga mga rekord, girekord nga mga kasaysayan nga gibatbat, ug uban pang handomanan nga gisumiter nimo o sa imong mga paryente o sa nakuha namo gikan sa publiko ug mga tinubdan sa kasaysayan sa tibuok kalibotan.

Ang FamilySearch nagtahod sa pagkapribado sa mga indibiduwal nga naggamit sa among Website. Dinhi niini nga Pahibalo sa Pagkapribado, among ilhon ang personal nga mga datos nga among makolekta, ang among basehan sa pagproseso sa personal nga mga datos, ug ang among mga termino sa pagproseso sa mga datos sumala sa imong mga katungod ug magamit nga balaod. Kami moawhag nimo sa pagbasa og maayo niining Pahibalo sa Pagkapribado sa dili pa mosumiter og personal nga mga datos ngari namo. Kay ang pagpadangat sa among Website nagdepende sa pagproseso sa imong personal nga mga datos sumala sa Mga Termino sa Paggamit ug sa Kasabotan sa Pagsumiter sa Sulod sa FamilySearch, palihog basaha usab og maayo kini nga mga dokumento.

1. Kinsa ang nagkontrolar sa imong personal nga mga datos?

Kon mopakigbahin ka sa imong personal nga mga datos sa among Website o moapil sa mga interaksiyon o mga komunikasyon uban namo, among iproseso ang imong personal nga mga datos isip ang tigkontrol sa mga datos.

Ang FamilySearch kauban ug gisuportahan sa Ang Simbahan sa mga Santos sa Ulahing mga Adlaw (ang “Simbahan”) isip usa ka pagserbisyo sa publiko. Ang paghimo og online nga account sa among Website wala magpasabot nga ikaw giendorso o kauban na sa Simbahan.

2. Unsa nga personal nga mga datos ang among kolektahon?

Mokolekta kami og personal nga mga datos nga (a) imong gisumiter; (b) gisumiter sa ubang mga tiggamit; (c) among girekord; ug (d) among nakuha gikan sa ikatulong partido.

a. Mga Datos nga Imong Gisumiter. Nagsumiter ka og personal nga mga datos ngari namo, ug kami mahimong mokolekta og personal nga mga datos nga imong gisumiter, kon maghimo ka og account sa among Website, mohangyo sa FamilySearch og mga materyal, mohangyo sa pag-akses sa mga serbisyo sa FamilySearch o sa Website, mosumiter o mo-upload sa imong personal nga mga datos sa FamilySearch nga mga himan o Website (pananglitan, maghimo sa imong family tree), o moapil sa ubang mga interaksiyon ug mga komunikasyon sa FamilySearch. Kon ikaw dunay interaksiyon sa FamilySearch ug maghimo og account, sa kasagaran among iproseso ang imong ngalan, petsa sa pagkatawo, numero sa telepono, email address, lokasyon (pananglitan, nasod), ug sekso. Mahimo usab ka nga mosumiter og account ug mga datos sa pagparehistro alang sa pagproseso, sama sa imong username, ipakita nga ngalan, password, email address, ug mga setting ug mga gusto.

Kon mogamit ka sa among mga serbisyo, mahimo usab ka nga mopili sa pagsumiter og dugang nga impormasyon aron moapil sumala sa imong kaugalingong inisyatiba diha sa ubang kalihokan sa genealogy sa FamilySearch, lakip na ang pagsumiter og personal nga mga datos sa genealogy (pananglitan, kalihokan sa kinabuhi, mga panghitabo sa kinabuhi, alternatibo nga mga ngalan, mga relasyon sa pamilya, tinuod nga mga panghitabo sa kinabuhi, mga handomanan, biyograpikal nga impormasyon), mga litrato, memorabilia, mga rekord, ug makasaysayanon nga impormasyon mahitungod nimo ug sa imong mga paryente. Mopili ka kon unsa nga personal nga mga datos ang isumiter, ug, sa pipila ka sitwasyon, makapili ka sa pagsumiter og impormasyon nga makonsiderar nga sensitibo, sama sa etniko nga gigikanan, kaliwatan, nasyonal nga kagikan, relihiyoso nga gigikanan, pagkalumulopyo, medikal nga impormasyon, o kahimtang sa imigrasyon. Hinuon, kinahanglang dili ka mosumiter o mopakigbahin og bisan unsang sensitibo nga mga datos sa mga tawo gawas sa imong kaugalingon kon kana nga mga tawo buhi pa.

b. Mga Datos nga Gisumiter sa Ubang mga Tiggamit. Sama sa among gipasabot sa dugang nga detalye ubos sa “Kang kinsa namo ipakigbahin ang personal nga mga datos?,” ang plataporma sa FamilySearch nagtugot sa ubang mga tiggamit sa Website, sama sa imong mga paryente, sa pagsumiter sa imong dili sensitibo nga personal nga mga datos isip kabahin sa family tree o sa ubang limitado nga mga himan ug mga feature. Ang abilidad sa pagpakigbahin sa sukaranang impormasyon mahitungod sa mga sakop sa pamilya mahinungdanon sa pagpahigayon sa mga pagsiksik sa genealogy ug sa pagkonekta sa mga tigsiksik ngadto sa ilang mga family tree. Kon ang usa ka tiggamit mosumiter og personal nga datos sa usa ka tawo nga buhi pa (“Datos sa Buhi”) ngadto sa family tree, kana nga Datos sa Buhi sa sinugdanan makita lamang sa tiggamit mismo. Sa pipila ka limitado nga mga sitwasyon, ang tiggamit mahimo usab nga mopakigbahin sa ingon nga mga datos diha sa adunay restriksiyon nga mga dapit sa website ngadto sa limitadong gidaghanon sa mga tiggamit diha sa eksklusibo nga grupo nga kahimtang, nga maakses pinaagi sa imbitasyon lamang. Ang matag tiggamit mao ang responsable sa ilang kaugalingong pagproseso sa bisan unsang Datos sa Buhi nga ilang isumiter o ipakigbahin sa Website, ug buhaton lamang kini alang sa personal nga mga katuyoan sa pagdokumento ug sa pagsiksik sa ilang family history, sama sa gikinahanglan sa Kasabotan sa Pagsumiter sa Sulod ug sa Mga Termino sa Paggamit. 

c. Mga Datos nga Among Irekord ug Cookies. Kon mobisita ka sa among mga kapanguhaan, ang among mga server (gamit ang mga log file o mga sistema sa pag-filter) mahimong mokolekta og impormasyon nga ipadala sa imong web browser matag higayon nga mobisita ka og website. Kini nga impormasyon mahimong maglakip apan dili limitado sa imong Internet Protocol address (IP address), matang sa browser, operating system, gipili nga pinulongan, ang nag-refer nga web page nga imong gibisitahan sa wala pa mosulod sa among site, ang petsa ug oras sa matag hangyo sa bisita, impormasyon nga imong gipangita diha sa among mga kapanguhaan, ug uban pang impormasyon nga gikolekta pinaagi sa cookies o susama nga mga teknolohiya. Palihog tan-awa sa Cookie Preferences tool (“Cookie Preferences”) nga gi-post diha sa matag usa sa among mobile nga mga application ug sa footer sa among mga website aron sa pagkat-on pa og dugang. Ang Cookie Preferences magtugot nimo sa pagpili sa mga matang sa cookies nga among gigamit. Kon dili nimo dawaton ang cookies, dili ka makagamit sa pipila ka seksiyon o mga function sa among mga site o mga application, sama sa gilatid diha sa Cookie Preferences Tool. Palihog hibaloi usab nga dili ka maka-disable sa piho nga cookies nga kinahanglanon sa labing mahinungdanong function sa Website. Pinaagi sa paggamit sa among Website, ikaw nagtugot sa paggamit sa cookies sama sa gihulagway diha sa Cookie Preferences. Mahimo ka nga mopili nga dili moapil sa piho nga mga cookies nga gigamit sa among Website pinaagi sa pagklik sa Cookie Preferences nga link sa kinaubsan nga bahin niini nga pahina.

d. Mga Datos sa Ikatulong Partido. Kon ikaw usa ka miyembro sa Simbahan, ug naghangyo ka nga ang imong account sa FamilySearch i-link sa imong online nga account sa Simbahan, kami mahimong makadawat sa imong personal nga mga datos (pananglitan, mga datos sa pagkamiyembro sa Simbahan ug mga datos sa account sa Simbahan) gikan sa may kalabotan nga entidad sa Simbahan.

Hangtod sa punto nga gitugotan sa mga balaod, kami usab mahimong makabaton sa personal nga mga datos sa genealogy ug sa kasaysayan mahitungod nimo gikan sa among mga arkibo o ubang anaa nga pampubliko nga mga tinubdan.

3. Unsaon namo sa pagproseso ang imong personal nga mga datos?

Sa kasagaran nga mga sitwasyon among iproseso ang imong personal nga mga datos pinaagi sa paggamit sa awtomatik nga mga pamaagi (awtomatik nga mga pagproseso), bisan og sa ubang mga sitwasyon mahimo namong iproseso ang imong personal nga mga datos nga dili mogamit sa awtomatik nga mga pamaagi (manwal nga pagproseso), o kombinasyon sa awtomatik ug manwal nga mga pamaagi sa pagproseso (gisagol nga pagproseso).

Ang pagproseso sa mga pagpadagan nga among ipahigayon sa imong personal nga mga datos mahimong maglakip sa mosunod: pagkolekta, pagrekord, pag-organisar, pagmugna, pagtipig, pagpahiangay o pag-usab, pag-analisar, pagkuha og balik, pagkonsulta, paggamit, pagbalhin (transmisyon, pag-akses, pagbutyag), lakip sa pagbalhin tabok sa utlanan sama sa gipasabot niini nga Pahibalo, pagpahisubay o pagsagol, paghimo og gigikanan nga mga datos, pagbutang og restriksiyon, pagpapas, o pagguba sa imong personal nga mga datos.

4. Alang sa unsa nga mga katuyoan nga moproseso kami og personal nga mga datos?

Moproseso kami sa imong personal nga mga datos agi og koneksiyon sa Website ug sa mga serbisyo nga gitanyag sa FamilySearch alang sa mosunod nga mga katuyoan:

• Pagsiksik sa Genealogy/Family History: Aron sa paghatag og pagbansay, mga kapanguhaan, ug mga himan nga motabang nimo ug sa imong mga paryente sa pagsubay sa imong katigulangan ug kaliwatan, paghimo sa imong family tree, pagpahigayon og pagsiksik sa family history, ug pagkonekta ngadto sa mga sakop sa pamilya.
• Pagpreserbar sa Makasaysayanon nga mga Rekord: Aron sa pag-digitize ug pag-arkibo sa makasaysayanon nga mga dokumento, mga litrato, mga artifact, ug pampubliko nga mga rekord alang sa umaabot nga mga henerasyon.
• Pagrekord sa Family History: Aron sa pagrekord sa importante nga impormasyon sa family history, impormasyon sa kasaysayan ug kultura nga mahimong mawala unta (pananglitan, gibatbat [oral] nga mga kasaysayan).
• Komunikasyon ug Pakigtambayayong: Aron sa pagtugot nimo nga makigkomunikar ug makigtambayayong ngadto sa ubang mga tiggamit sa higayon nga maghimo og pagsiksik sa family history, sama diha sa among feature sa panaghisgot.
• Pagdumala sa Website:
  • Aron sa pagpanghimatuod sa imong pag-akses ngadto sa imong account sa FamilySearch ug sa uban pang mga application ug mga serbisyo sa FamilySearch.
  • Aron sa pakigkomunikar nimo, sa pagtubag sa imong mga pangutana, ug sa paghatag nimo og impormasyon kalabot sa teknikal, seguridad, o ubang mga isyu sa pagpadagan.
  • Aron sa pag-ugmad ug pagpalambo sa among Website, mga himan, ug mga serbisyo, lakip ang pagsubay sa mga pag-analisar sa imong kalihokan sa FamilySearch nga Website.
  • Aron sa pagpahibalo nimo sa bag-ong mga application ug mga serbisyo sa FamilySearch, sa pagdapit nimo nga moapil, ug sa pag-alerto nimo ngadto sa bag-ong potensiyal nga mga paryente sa imong family tree.
  • Aron malikayan ang sayop, pagpangilad, o kriminal nga kalihokan, ug mapatuman ang among Mga Termino sa Paggamit.

5. Unsa ang among legal nga basehan sa pagproseso sa imong personal nga mga datos?

Naningkamot kami sa pagseguro nga kami adunay patas ug balaodnon nga basehan sa pagproseso sa tanang personal nga mga datos nga among nakolekta. Ang among legal nga basehan sa pagproseso tingali managlahi depende sa dapit sa website; ang mga katuyoan sa among pagproseso sa personal nga mga datos, naglakip sa mga katuyoan nga gihulagway sa ibabaw diha sa “Alang sa unsa nga mga katuyoan nga moproseso kami og personal nga mga datos;” ug sa lokal nga legal nga mga gikinahanglan diha sa imong hurisdiksiyon.

Ang among nag-unang legal nga basehan sa pagproseso sa personal nga mga datos sa mga tiggamit mao ang pagtugot, diin among makuha gikan nimo kon maghimo ka og account sa among Website, matag karon ug unya kon mag-upload ka og personal nga impormasyon sa among Website, o kon mosulat ka sa ubang mga porma diin mosumiter ka sa imong personal nga impormasyon ngadto sa FamilySearch.

Kami usab mahimong moproseso sa personal nga mga datos aron sa pagpreserbar sa among lehitimo nga mga katuyoan isip dili pangnegosyo nga organisasyon sa pagsiksik sa genealogy, lakip na kon kinahanglanon ang paghatag og plataporma alang nimo aron sa pagpahigayon ug sa pagdokumento sa pagsiksik sa genealogy ug sa pag-audit, pag-analisar sa mga datos, pag-troubleshoot sa sistema, legal nga mga katungod, ug mga obligasyon sa regulasyon. Sa matag sitwasyon, kami mobalanse sa among lehitimo nga mga katuyoan nga magtan-aw sa imong mga katungod ug mga kagawasan ug moproseso lamang sa mga datos nga kinahanglanon aron matuman ang mga katuyoan nga gihulagway sa ibabaw.

Sa ubang mga dapit nga adunay restriksiyon sa among Website, mohatag kami og eksklusibo nga plataporma diin ang mga tiggamit tugotan sa pagpakigbahin sa Datos sa Buhi ngadto sa gamay nga grupo sa ubang gidapit nga mga tiggamit, ingon nga kinahanglanon ang pagpahigayon sa pagsiksik sa genealogy. Dinhi niini nga mga dapit, ang FamilySearch moproseso sa hinatag sa tiggamit nga mga sulod nga naglangkob sa Datos sa Buhi alang sa mga tiggamit, sumala sa mga instruksiyon sa tiggamit. Dili kami moproseso o mogamit sa Datos sa Buhi alang sa among kaugalingong mga katuyoan o motino sa legal nga basehan alang sa pagproseso. Ang matag usa sa tiggamit mao ang responsable sa ilang kaugalingong pagproseso sa bisan unsa nga Datos sa Buhi nga ilang isumiter o ipakigbahin sa Website. Pahibaloon ka kon nakasumiter ka sa datos sa usa niini nga dapit (pananglitan, gipanag-iya sa tiggamit o sa grupo nga mga tree) ug pahinumdoman nga ikaw mao ang responsable sa bisan unsa nga Datos sa Buhi nga imong isumiter. 

Depende sa lokal nga mga gikinahanglan sa imong hurisdiksiyon, kon magproseso ka sa Datos sa Buhi agi og koneksiyon sa personal o pamilya nga kalihokan lamang dili ka mahimong mapaubos sa mga gikinahanglan sa balaod sa pagkapribado. Sa bisan unsa nga sitwasyon, hinuon, kinahanglan nga ikaw adunay katungod o pagtugot sa pagpakigbahin sa bisan unsa nga Datos sa Buhi ngadto sa ubang mga tiggamit sumala sa Kasabotan sa Pagsumiter sa Sulod ug Mga Termino sa Paggamit sa FamilySearch.  

6. Kang kinsa namo ipakigbahin ang personal nga mga datos?

Mahimo ka nga mopahunong namo sa pagpakigbahin sa imong personal nga impormasyon o limitahan ang impormasyon nga among ipakigbahin pinaagi sa pag-usab sa imong mga gipili nga profile o pinaagi sa pagkontak namo gamit ang impormasyon nga gihatag sa ubos. Ipakigbahin namo ang imong personal nga mga datos ngadto sa ubang mga partido sa mosunod nga mga kahimtang:

a. Ikatulo nga Partido nga mga Service Provider. Mahimo kaming mohatag og personal nga mga datos, lakip na sa pipila o tanan sa mga kategoriya nga gihisgotan niini nga Pahibalo, ngadto sa ikatulong mga partido aron sa pagpahigayon sa mga function alang namo isip mga tigproseso sa datos o mga sub-processor (pananglitan, pagproseso sa bayad, pagmentinar, seguridad, pag-analisar sa mga datos, pag-host, mga serbisyo sa pagsukod, social media messaging nga gibase sa mga datos, mga survey, ug uban pa). Sa ingon nga mga sitwasyon, sumala niini nga Pahibalo ug ingon sa gikinahanglan sa magamit nga mga balaod, ang mga tigsangkap sumala sa kontrata kinahanglang manalipod sa personal nga mga datos gikan sa dugang nga pagproseso (lakip na sa mga katuyoan sa marketing) ug sa pagbalhin. Alang sa lista sa ikatulong mga partido nga mahimong mokolekta sa pipila sa imong personal nga impormasyon gamit ang cookies, palihog tan-awa sa Cookie Preferences. 

b. Mga Kauban sa Simbahan. Sa pipila ka limitado nga mga kahimtang, mahimo kami nga mopakigbahin og limitado nga personal nga mga datos, sama sa pag-analisar ug mga datos sa imong kalihokan diha sa FamilySearch nga Website, ngadto sa nag-isponsor nga mga entidad sa Simbahan aron mapalambo ug mapauswag ang among mga serbisyo. Niini nga mga sitwasyon, ang personal nga mga datos dili ibutyag kutob sa mahimo. Ang FamilySearch mahimo usab nga mogamit sa pipila sa gipakigbahin nga mga kapanguaan sa Simbahan (pananglitan, software) sa pagdumala sa personal nga mga datos, apan ang personal nga mga datos sa FamilySearch maakses lamang sa kawani sa FamilySearch nga adunay lehitimo nga panginahanglan nga masayod aron mapatuman ang mga katuyoan sa FamilySearch sumala niini nga Pahibalo. Kon ikaw usa ka miyembro sa Simbahan ug boluntaryong mi-link sa imong impormasyon sa pagkamiyembro sa Simbahan ngadto sa imong account sa FamilySearch, ikaw miuyon nga ang FamilySearch mahimong mopakigbahin og personal nga impormasyon nga imong gisumiter ngadto sa may kalabotan sa Simbahan nga mga entidad alang sa katuyoan sa pagdokumento sa mga ordinansa ug buhat sa templo.

c. Mga Tiggamit sa Website. Aron mas maprotektahan ang imong pagkapribado, among gidesinyo ang Website aron ang mga tiggamit tugotan lamang sa pagpakigbahin sa Datos sa Buhi ngadto sa ubang mga tiggamit sa website sa piho nga mga dapit nga adunay restriksiyon sa website, nga maakses lamang pinaagi sa imbitasyon. Niining mga dapit nga adunay restriksiyon, mahimo ka nga mopili nga ang pipila sa opsiyonal nga impormasyon sa genealogy nga imong ihatag sa Website maakses sa ubang mga tiggamit sa FamilySearch (pananglitan, impormasyon nga imong i-upload sa imong family tree). Kon wala ang imong hangyo o aksiyon, ang FamilySearch dili motugot nga ang Datos sa Buhi nga imong gihatag maakses ni bisan kinsa gawas nimo, nga nagsumiter. Kinahanglan ka nga mopili nga maanaa kini (pananglitan, kon moapil ka sa grupo ug mopakigbahin sa personal nga mga datos sulod niana nga grupo). Hinuon, kinahanglang dili ka mosukip og mga handomanan nga adunay Datos sa Buhi ngadto sa namatay na nga tawo sa pampubliko nga tree. Ang FamilySearch naningkamot nga malimitahan ang mga sitwasyon diin makapakigbahin ka og Datos sa Buhi aron sa pagtuman sa magamit nga mga balaod ug sa pagpanalipod sa pagkapribado sa imong mga paryente.

Sama sa gipasabot sa ibabaw, ang matag tiggamit mao ang responsable sa ilang kaugalingong pagproseso sa bisan unsa nga Datos sa Buhi nga ilang isumiter o ipakigbahin sa Website. Kon ikaw mopili sa pagpakigbahin sa Datos sa Buhi ngadto sa ubang mga tiggamit, ikaw miuyon nga ikaw mao ang responsable niana nga datos; nga ikaw adunay katungod o pagtugot sa pagpakigbahin niana nga datos ngadto sa ubang mga tiggamit sumala sa Kasabotan sa Pagsumiter sa Sulod ug sa Mga Termino sa Paggamit; sa FamilySearch; nga imong ipakigbahin lamang kana nga datos alang sa mga katuyoan sa personal ug genealogical nga pagsiksik; ug ang ingon nga pagpakigbahin nagtuman sa magamit nga mga balaod.  

Mahimo nimong ipahiangay ang makakita sa personal nga mga datos ngadto sa ubang mga tiggamit sa FamilySearch o ngadto sa publiko bisan kanus-a pinaagi sa pag-usab sa imong settings sa pagkapribado o pinaagi sa pagkontak namo gamit ang impormasyon nga gihatag sa ubos. Ang tanang handomanan nga adunay Datos sa Buhi kinahanglang itakda nga “pribado.” 

Hinuon, ang FamilySearch pwede mohimo sa pipila ka personal nga mga datos nga nakuha gikan sa publiko ug sa makasaysayanon nga mga tinubdan nga maanaa sa publiko kon tugotan sa magamit nga mga balaod.

d. Legal nga mga Kinahanglanon. Mahimong iakses ug ibutyag namo ang imong personal nga mga datos, mga post, online nga mga chat, personal nga mga sulat, sulod [content], o ubang mga pagsumiter ngadto sa ikatulo nga partido kon kami tinuoray nga nagtuo nga ang pagbuhat sa ingon gikinahanglan sa usa ka supena, sa usa ka panghukmanan o pang-administratiba nga mando, o gikinahanglan kini sa balaod. Dugang pa, mahimo namong ibutyag ang imong personal nga mga datos ug ubang impormasyon kon gikinahanglan sa balaod o aron sa paggamit o sa pagpanalipod sa legal nga mga katungod; sa pagpangandam batok sa mga tulubagon; sa pagpanalipod sa mga katungod, kabtangan, o kasegurohan sa kapanguhaan ni bisan kinsa nga indibiduwal o sa kinatibuk-ang publiko; sa pagmentinar ug pagpanalipod sa seguridad ug integridad sa among mga serbisyo o inprastraktura; sa pagpanalipod sa among kaugalingon ug sa among mga serbisyo gikan sa malimbongon, abusado, o ilegal nga mga paggamit; sa pag-imbestigar ug sa pagpanalipod sa among kaugalingon batok sa mga pagpangangkon o pamasangil sa ikatulong mga partido; o sa pagtabang sa mga ahensiya sa gobyerno nga nagpatuman sa balaod.

7. Asa namo tipigan ang personal nga mga datos?

Mahimo namong tipigan ang imong personal nga mga datos sa gawas sa imong nasod nga gipuy-an, lakip na sa Estados Unidos, diha sa mga server, sa cloud storage nga mga solusyon, o sa mga lugar sa FamilySearch ug sa kauban niini nga nag-isponsor nga mga entidad. Aron sa pagseguro og igong proteksiyon sa personal nga mga datos nga gibalhin ngadto sa laing mga hurisdiksiyon, among taposon ang mga kasabotan sa pagbalhin sa mga datos ug sa pagproseso tali sa FamilySearch ug sa among mga service provider, kauban nga mga entidad, ug mga arkibo diin legal nga gikinahanglan. Kini nga mga kasabotan sa pagbalhin naglakip sa Standard Contractual Clauses nga giaprobahan sa European Commission agi og pagtuman sa EU nga balaod o ubang mga lagda sumala sa gikinahanglan sa magamit nga balaod (nga mahimo nimong marebyo kon ikaw mokontak namo gamit ang impormasyon nga anaa sa kataposan niini nga Pahibalo).

8. Unsaon namo sa pagpanalipod ang personal nga mga datos?

Naggamit kami og teknikal ug organisasyonal nga mga pamaagi aron maprotektahan ang personal nga mga datos nga among madawat batok sa pagkawala, sayop nga paggamit, ug dili awtorisado nga pag-usab ug aron maprotektahan ang pagka-kompidensiyal niini. Kanunay kaming morebyo sa among mga pamaagi sa seguridad ug mokonsiderar sa labing bag-o sa teknolohiya sa seguridad ug mga pamaagi. Mogamit usab kami og labing bag-ong teknolohiya sa encryption [paagi sa pag-usab sa impormasyon aron dili magamit nga walay pagtugot] aron ma-encrypt ang pagpadala sa mga datos sa among mga log-in nga pahina. Hinoon, tungod kay dili kami makagarantiya sa kahingpit sa seguridad niini nga mga teknolohiya sa encryption, palihog pag-amping kon magsumiter og personal nga mga datos diha sa internet.

9. Hangtod kanus-a magpabilin namo ang personal nga mga datos?

Magpabilin namo ang nakolekta nga personal nga mga datos, lakip na ang impormasyon nga nakolekta pinaagi sa Website ug sa ubang mga pagsumiter, sulod sa igong panahon aron matuman ang mga katuyoan sa pagproseso nga nahisgotan na. Dayon amo kining iarkibo sulod sa gidugayon sa panahon nga gikinahanglan sa balaod. Kon ang pag-arkibo wala na kinahanglana, among i-delete ang personal nga mga datos gikan sa among mga rekord sulod sa panahon nga gikinahanglan sa magamit nga balaod, uban sa eksepsiyon sa limitadong profile nga impormasyon sa kasaysayan ug personal nga mga datos nga ipabilin isip kabahin sa permanente nga mga rekord sa genealogy ug sa kasaysayan.

10. Unsaon nimo sa pag-akses ug pagkorehir sa imong personal nga mga datos?

Naningkamot kami nga mamentinar ang pagkaeksakto sa personal nga mga datos ug mosalig kanimo sa pagseguro nga ang imong personal nga mga datos ug ang bisan unsa nga Datos sa Buhi nga imong gisumiter kompleto ug eksakto. Mahimo kang mohangyo nga moakses sa imong personal nga mga datos ug mosuta, mokorehir, o mo-update niini, ug limitahan ang makatan-aw sa imong personal nga mga datos pinaagi sa imong pagparehistro sa piho nga website, pinaagi sa imong profile, o pinaagi sa imong Account sa FamilySearch, kon magamit. Sa pagrebyo niini nga mga opsiyon, palihog bisitaha ang settings sa imong Account sa FamilySearch dinhi.

Depende sa hurisdiksiyon sa imong gipuy-an, ang mga balaod sa pagpanalipod sa konsumidor o pagkaribado mahimong makahatag nimo og dugang nga mga katungod kalabot sa paggamit sa imong personal nga impormasyon. Mahimo ka nga mokontak namo aron magamit ang dugang nga mga katungod sa balaod gamit ang impormasyon nga gihatag sa ubos. Ang ingon nga mga katungod naglakip:

• sa katungod nga pahibaloon, lakip na sa pag-angkon og usa ka kopya sa personal nga mga datos nga among gihuptan mahitungod nimo;
• sa katungod sa pag-akses ug sa pag-delete sa personal nga mga datos;
• sa katungod sa pagkorehir sa personal nga mga datos;
• sa katungod sa pagdala sa mga datos; ug
• sa katungod sa pagpili nga dili moapil sa pagpadayon sa pagproseso o sa paghatag og restriksiyon sa pagproseso.

Ang eksaktong gilapdon niini nga mga katungod mahimong managlahi sumala sa hurisdiksiyon. Palihog kontaka kami kon adunay mga pangutana o sa paggamit niini nga mga katungod.

Ikaw adunay katungod usab nga mosang-at og reklamo ngadto sa nagdumala nga awtoridad, depende kon asa ka nagpuyo.

Kon ang laing tiggamit nagproseso ug nagpakigbahin sa imong personal nga impormasyon, palihog kontaka kana nga tiggamit aron hangyoon sila sa pag-delete o sa pagkorehir sa bisan unsang personal nga mga datos nga ilang gisumiter o gipakigbahin mahitungod nimo. Ang matag tiggamit mao ang responsable sa ilang kaugalingong pagproseso sa bisan unsang Datos sa Buhi nga ilang isumiter o ipakigbahin sa Website mahitungod sa laing mga tawo. Mahimo usab ka nga direktang moduol namo gamit ang impormasyon sa pagkontak nga gihatag sa ubos ug makatabang kami sa pagkorehir o sa pag-delete sa imong personal nga impormasyon kon hangyoon.

Kon magkaproblema ka sa pag-usab, pag-delete, o pag-update sa imong personal nga mga datos, mahimo ka nga mokontak namo gamit ang impormasyon nga anaa sa kataposan niini nga Pahibalo.

11. Petsa sa pagpatuman ug mga pag-amendar.

Kini nga Pahibalo ipatuman sa Enero 14, 2025, ug mahimong amendahan matag karon ug unya.

12. Kontaka kami.

Ang mga pangutana kalabot niini nga Pahibalo o sa seguridad sa personal nga mga datos nga among giproseso mahimong ipadala pinaagi sa among website, fax, o sulat:

Website: FamilySearch.org/dataprivacy
Fax:         +1-801-240-1187
Sulat:       FamilySearch Data Privacy Office
                 50 E. North Temple Street
                 Salt Lake City, UT 84150-0005
                 USA

Kon nagpuyo ka sulod sa European Economic Area, mahimo ka nga mokontak sa representante sa FamilySearch’s GDPR Art.  27 pinaagi sa sulat o email:

Mail: IITR Cert GmbH
Eschenrieder Str. 62 c, D-82194
Gröbenzell, Germany
Email: privacy@FamilySearch.org