Aleapau ki hono Fakahū ha Fakamatala ki he FamilySearch

Ko e FamilySearch Fakavahaʻapuleʻangá (“FamilySearch,” “mau”, “kimautolu”, pe ko ha lea meimei tatau) ko ha kautaha ‘ikai fakatupu paʻanga. Ko e moʻua mo e ngaahi fatongia ʻo e FamilySearch ʻo fekauʻaki mo hono pulusí pea mo hano toe fakaʻaongaʻi kehe ʻo ha faʻahinga fakamatala pe naunau naʻá ke tānaki mai ki he FamilySearch.org (ko e “Saiti” ko ʻení) ʻoku fakangatangata pau ʻa e Ngaahi Tuʻutuʻuni ki Hono Fakaʻaongaʻí ʻe he Saiti ko ʻení (ko e “Ngaahi Tuʻutuʻuni ki Hono Fakaʻaongaʻí”) pea mo e Aleapau Ki Hono Fakahū ʻo ha Fakamatala ki he FamilySearch (ʻi he “Aleapaú” ni).   Ko e Aleapaú ni ʻokú ne toe fakamatalaʻi mai mo/pe toe fakalahi ki he Ngaahi Tuʻutuʻuni ki hono Fakaʻaongaʻí; ka ʻoku ʻikai ke ne fetongi pe liliu ʻa e Ngaahi Tuʻutuʻuni ki hono Fakaʻaongaʻí. ʻOku fakatahaʻi fakatouʻosi ʻa e Ngaahi Tuʻutuʻuni ki hono Fakaʻaongaʻí mo e Aleapaú ʻo hangē kuo ʻosi fakamatalaʻi fakaʻaulilikí, ʻiate kinaua fakatouʻosí. ʻI hono fakahū, foaki, pe ko hano pulusi ‘o ha faʻahinga fakamatala pe naunau ki ha faʻahinga konga ʻo e Saití ni, ʻokú ke loto-fiemālie ki he Ngaahi Tuʻutuʻuni ki hono Faka‘aongaʻí mo e kotoa ʻo e ngaahi tuʻutuʻuni mo e ngaahi tuʻunga ‘o e Aleapaú ni.

1. Ko ho fatongia ‘a e ngaahi fakamatala ‘oku ke fakahu mai ki he Saiti ni.
 Ko e fili ke fakahū hake ha fakamatala, fakamatala fakatohihohoko, ngaahi ʻīmisi, tohi, fakamatala fakapepa, lekooti kuo hiki tepi, fealēlea‘aki, pe ko ha ngaahi naunau kehe (fakakātoa mo fakafo‘ituitui, “Ngaahi Fakamatala kuó ke Loto ke ʻOmi”) ki he Saiti ko ‘ení, ko ho fatongia ia ʻoʻou. Ko e Ngaahi Fakamatala Kotoa Pē ʻokú ke fakahū hake ki he Saití ni, ʻe lava ke fakaʻaliʻali mo fakaʻatā ki he niʻihi kehé ke nau fekumi, sio, fanongo pe ko hono ngāue ʻaki ia ʻo fakatatau mo e Ngaahi Tuʻutuʻuni ki hono Fakaʻaongaʻí pea mo e Aleapaú ni.  ʻOua te ke fakahū mai ha meʻa ʻoku ʻikai te ke loto ke ʻatā ki he niʻihi kehé.

2. Totonu ki he Fakahuú.  ʻI hoʻo fakahū mai ʻa e Ngaahi Fakamatala ʻokú ke Loto ke ʻOmi ki he Saití ni, ʻokú ke fakapapauʻi ai ʻokú ke maʻu ʻa e totonu fakalao ke foaki ʻa e Ngaahi Fakamatala kuó ke Loto ke ʻOmí pea ko hono fakahuú mo hono fakaʻaongaʻí ʻoku fakatatau ia mo e Ngaahi Tuʻutuʻuni ki hono Fakaʻaongaʻí pea ʻikai maumauʻi ʻe he Aleapaú ni ʻa e totonu fakafoʻituitui ʻa ha taha kehe, ngaahi totonu ki he tuʻuakí, totonu ki he aleapaú, maʻu mafai pulusí, pe ngaahi totonu fakapule kehé. ʻI hono fakapapauʻi hoʻo totonu fakalao ke fakahū ʻa e Ngaahi Fakamatala ʻokú ke Loto ke ʻOmí, ‘okú ke tali ai ʻa e fatongia fakalao ki haʻamau (mo e kau maʻu ngofua meiate kimautolú) faka‘aongaʻi ʻa hoʻo Ngaahi Fakamatala ʻokú ke Loto ke ʻOmí.

3. Maʻu Mafai Pulusí.  ‘Oku mau ʻiloʻi mo fakaʻapaʻapaʻi ‘a e maʻu mafai pulusí mo e ngaahi totonu ki he ngaahi koloa fakaʻatamai kehe ʻa e ni‘ihi kehé. Fakatokangaʻi ange ko e ngaahi fakamatalá, kau ai mo e ngaahi taá, ngaahi talanoá, mo e ngaahi a‘usia fakatāutahá, tatau ai pē kapau ne fakahū ki ha konga ʻo e Saití ni ka ‘oku kaunga kiate koe, ko e koloa pē ia ʻa e tokotaha naʻá ne faʻú pe fakahuú. ʻOku ʻikai totonu ke ke toe faʻu hano tatau ʻoku teʻeki ke fakangofua mai mei he tokotaha ‘oku ʻa‘aná. Ngaahi tā fakafoʻituitui ‘o ha niʻihi ʻoku kei mo‘ui, tuku kehe pē hoʻo longaʻifānau teʻeki ke nau taʻu fakalaó, kuo pau ke ʻoua naʻa tuku hake ia taʻe te nau loto ki ai. ʻI he taimi ʻoku faʻu ai ha ongo/leʻo ʻoku hiki tepi, ʻoku totonu ko e fakamatala fakataautaha ʻoku lekōtí ko e fakamatala ia ʻaʻau, pe kapau ko ha faʻu ʻe ha tokotaha kehe (hangē ko ha maau pe fakamatala), ke fakaʻaongaʻi pē ʻi hano fakangofua ʻe he tokotaha ʻoku haʻaná.

4. Ngaahi Laiseni mo e Ngaahi Totonu ʻoku Foaki Mai Maʻatautolú.  ʻI hoʻo fakahū mai ha Ngaahi Fakamatala ʻokú ke Loto ke ʻOmi ki he Saiti ko ʻení, ʻokú ke foaki ai ki he FamilySearch ʻa e ngofua taʻe fakangatangata, kuo ʻosi totongi kakato,  ʻoku ʻikai ha totongi huhuʻi, fakaemāmani lahi, he ʻikai lava ke toe liliu, pe toe laiseni ki ha taha kehe, ka kuo laiseni tuʻumaʻu ke ngāue ʻaki ʻa e Fakamatala kuó ke Loto ke ʻOmí pe fakahū mai ki he Saití ni ʻi ha toe founga kehe, ki ha faʻahinga taʻumuʻa pē, ʻi ha faʻahinga founga pē pea ʻi ha faʻahinga fōtunga pē pe mītia, te mau pehē, ʻi heʻemau fakakaukau fakapotopotó, ʻoku taau ki hono paotoloaki homau misioná ke fakaʻaiʻai ʻa e hisitōlia fakafāmilí mo e fakatotolo fakatohihohokó. Ke hoko ko e konga ‘o e laiseni ko ʻení ʻokú ke ‘omai kiate kimautolu ʻa e ngofua taʻe fakangatangata ke hiki tatau, fakaʻaliʻali ki he kakaí, ‘ave (transmit), fakamafola, fakahoko ʻi ha haʻofanga kakai, tufaki, toe laiseni ki ha taha kehe, fa‘u ha ngaahi ngāue kehe ʻoku ʻi ai haʻane fekauʻaki mo ia mei he (ʻo kau ai, ʻa e ʻikai ke fakangatangatá, ‘aki hano fakatahaʻi kotoa pe ko ha konga ‘a hoʻo Ngaahi Fakamatala kuó ke Loto ke ʻOmí fakataha mo e ngaahi fakamatala ʻoku ʻomi ʻe he kakai kehé pe ko hono liliu ʻa hoʻo Ngaahi Fakamatala ʻokú ke Loto ke ʻOmí), pe ko hono ngāue ʻaki (mo fakangofua ke fakaʻaonga‘i ʻe he ni‘ihi kehé) hoʻo Ngaahi Fakamatala ʻokú ke Loto ke ʻOmí ‘i he funga ʻo e māmaní, ‘i ha faʻahinga founga ʻoku mau pehē ʻoku taau (fakaʻilekitulōnika pe ‘ikai, kau ai ʻi he ʻInitanetí).

5. Tonu ʻo e Fakamatala ne ʻOmaí. ʻOkú ke loto-fiemālie ke ‘omai ʻa e fakamatala mo‘oni, tonu pea kakato kiate kimautolu. Kapau ʻoku ʻi ai ha fakamatala naʻá ke tuku mai ʻoku ʻikai totonu pe takihalaʻi ʻi he anga ʻemau vakai tauʻatāina mo fakapotopoto tahá, ʻoku mau maʻu ʻa e totonu kae ʻikai ko e fatongia, ke fai ha faʻahinga meʻa ke fakaleleiʻi pe taʻofi ʻaki ia ʻo fakatatau ki heʻemau fakakaukau fakapotopotó ʻo kau ai ʻa hono taʻofi ke toe ngāue ʻaki, tamateʻi mo/pe liliu ha konga ʻo hoʻo Fakamatala kuó ke Loto ke ʻOmí.

6. Fakatokangaʻi mo fakaʻapaʻapaʻi ʻa e Niʻihi Kehe ʻoku nau Ngāue ʻaki [ʻa e Saití ni].  ʻOku mau kole atu ke ke fili fakapotopoto ‘i hono fakahū mai hoʻo Ngaahi Fakamatala kuó ke Loto ke ʻOmí. ‘Oku mau tauhi maʻu ʻa e totonu ke to‘o ha faʻahinga Fakamatala kuó ke Loto ke ʻOmi ʻa ia ʻoku mau tui, ‘i heʻemau vakai tauʻatāina mo fakapotopoto tahá, (a) ‘oku ʻikai ‘aonga, (e) ʻoku malava ke fakamamahi pe fakamā ki ha taha pē ʻoku kei moʻui, (f) ʻoku fakatupu ‘ita, ʻikai taau, ʻikai feʻunga, fakamanamana, pe ngaohikovia pe (h) ʻokú ne maumau‘i ʻa e Aleapaú ni, ʻa e Ngaahi Tuʻutuʻuni ki hono Fakaʻaongaʻí, pe ko e Ngaahi Fakahinohino mo e Ngaahi Tuʻutuʻuni ki Hono Tuku Hake (Upload) ʻo ha Meʻá Te mau lava foki ʻo fakahoko ha faʻahinga ngāue, kau ai hono fakangatangata ʻa hono ngāue ʻakí koeʻuhí ko hono maumauʻi ʻo e Aleapaú ni, mo hono fakahā ki he kau polisi fakalotofonuá ha faʻahinga ʻekitivitī ʻoku hā mai ʻokú ne maumauʻi ʻa e ngaahi lao ʻoku fekauʻaki mo iá, ʻi he anga ʻo ʻemau vakai tauʻatāina mo fakapotopotó.    

7. Ngaahi Sivi Fakakomipiutá. ʻOku mau tauhi maʻu ʻa e totonu, kae ʻikai ko ha fatongia ke tokangaʻi mo fakatonutonu hoʻo Ngaahi Fakamatala kuó ke Loto ke ʻOmí.    ʻOku mau fakaʻaongaʻi ʻa e meʻangāue sivi fakakomipiuta ki hono taʻotaʻofi ʻo ha Ngaahi Fakamatala kuó ke Loto ke ʻOmi ʻa ia ʻoku hā mai ʻoku ʻi ai ʻene kaunga ki ha tokotaha kei moʻui pe ʻokú ne maumauʻi ʻa e Ngaahi Tuʻutuʻuni ki hono Fakaʻaongaʻí pe ko e Aleapaú ni ʻi he anga ʻo ʻemau fakaʻutoʻuta lelei tahá.    Neongo ‘oku ‘ikai ke mau haʻisia ke fakahoko ʻeni, ka ʻoku mau tauhi maʻu ʻa e totonu ke liliu hoʻo Ngaahi Fakamatala kuó ke Loto ke ʻOmí ʻi ha faʻahinga ʻuhinga pe ta’e ‘i ai ha ‘uhinga.

8. Tokangaʻi ʻo e Ngaahi Meʻa ʻoku Fakahū Maí.  ʻOku mau loto ke fakaʻaongaʻi ha ngaahi ngāue feʻunga ke fakatolonga ʻa e moʻoni ʻo e Fakamatala kuó ke Loto ke ʻOmí pea ke fakaʻehiʻehi mei he ngaahi fehalaaki pe ngaahi meʻa naʻe ʻikai ke kau atu ʻi he fakamatala ʻo e Saití ni.    ‘Oku mau ʻoatu ha faingamālie ke fakahū mai ʻa e Ngaahi Fakamatala kuó ke Loto ke ʻOmí kae fakatatau ki he Ngaahi Tuʻutuʻuni ki hono Fakaʻaongaʻí pea mo e Aleapaú ni. Ko e ngaahi ngāue peheé pea mo e Saití ni ʻoku ʻomai ia ʻi hono tuʻunga “LOLOTONGÁ”, pea he ʻikai ke mau haʻisia pe mo‘ua ki he ngaahi fehalaākí pe ngaahi meʻa na‘e ʻikai fakakau ʻi ha faʻahinga fakamatala te ke lava ke maʻu ‘i he saití ni, pe ki ha faʻahinga mole, maumau pe uesia ‘a e Ngaahi Fakamatala kuó ke Loto ke ʻOmí ʻa ia ʻokú ke fakahū maí.  Te ke lava ‘o toʻo ha faʻahinga Fakamatala kuó ke Loto ke ʻOmi mei he Saití ni, ka he ʻikai fie maʻu ke mau toʻo ʻa e ngaahi fehokotakiʻangá pe ngaahi tohi fakaongoongolelei ki he Ngaahi Fakamatala naʻá ke Loto ke ʻOmi ka kuo toʻó.  Tānaki atu ki aí, ʻokú ke fakahaaʻi mo loto-fiemālie ko e taimi pē kuo mau laiseni ai hoʻo Ngaahi Fakamatala kuó ke Loto ke ʻOmí ki ha niʻihi kehé, mahalo he ʻikai ke mau lava, pea ʻoku ʻikai ko homau fatongia ke taʻofi ʻa e niʻihi kehe kuo nau laisení mei hono ngāue ʻaki ʻa hoʻo Ngaahi Fakamatala kuó ke Loto ke ʻOmí.  ʻOku ʻikai ke mau moʻua ki ha maumau makehe pe ko ha ngaahi maumau ne tupu mei hono fakahū mai ʻa hoʻo Ngaahi Fakamatala kuó ke Loto ke ʻOmí pe ko ʻemau fakafisi ke tali ʻa hoʻo Ngaahi Fakamatala kuó ke Loto ke ʻOmí.     Kātaki ʻo vakai ki he Ngaahi Tuʻutuʻuni ki hono Fakaʻaongaʻí ki ha toe fakamatala lahi ange.

9. Ngaahi Lao ki hono Maluʻi ʻo e Ngaahi Fakamatalá.  Kapau ʻokú ke nofo ʻi tuʻa ʻi he ʻIunaiteti Siteiti ʻo ʻAmeliká, ʻokú ke loto ki hono ngāue ʻaki ʻi he ʻIunaiteti Siteiti ʻo ʻAmeliká ha faʻahinga fakamatala fakataautaha ʻokú ke fakahū.    ʻOkú ke toe loto-fiemālie foki ki hono tauhi ʻa e ngaahi lao kotoa pē ʻoku fekau‘aki mo hono ʻave fakaʻilekitulōnika hoʻo ngaahi fakamatala fakatāutahá ki pe mei he ‘Iunaiteti Siteiti ʻo ‘Ameliká pea mo e fonua ʻokú ke nofo aí.

Ngaahi Tuʻutuʻuni ki he ʻUlungāngá.  Kātaki ʻo lau fakalelei ʻa e vahe ʻo e Ngaahi Tuʻutuʻuni ki he ʻUlungaanga ʻo e Ngaahi Tuʻutuʻuni ki hono Fakaʻaongaʻí, ʻa ia, fakataha mo e ngaahi vahe kehe kotoa pē ʻi he Ngaahi Tuʻutuʻuni ki hono Fakaʻaongaʻí, ʻoku kaunga ki he Aleapaú ni.

Liliu Fakamuimuitahá 2023-09-01